Кыргызстандын ИДПсы 8 айда 11 пайызга өстү
Кыргызстанда 2026-жылдын январь-август айларында ички дүң продукттун көлөмү алдын ала баалоо боюнча 1 триллион 396,8 млрд сомду түзүп, өткөн жылдын ушул мезгилине салыштырмалуу 11 %га өстү.
Улуттук статистика комитетинин маалыматына караганда, отчеттук мезгилде өнөр жай өндүрүшүнүн көлөмү 600,8 млрд сомду түзүп, физикалык көлөмдүн индекси 108,8 % болду.
Өнөр жайдагы өсүш негизги металлдарды, тамак-аш азыктарын жана тамеки продукцияларын, фармацевтикалык жана химиялык продукцияларды, курулуш материалдарын, транспорт каражаттарын, тазаланган мунай продукцияларын өндүрүүнүн, ошондой эле пайдалуу кендерди казуунун көбөйүшү менен камсыздалды. Айрым тармактарда өсүш кыйла жогору болуп, химиялык продукцияларды өндүрүү 2,3 эсеге, тазаланган мунай продукцияларын өндүрүү 1,8 эсеге өстү.
Ошондой эле курулуштун көлөмү 1,6 эсеге, айыл чарбасы 6,4 %га, дүң жана чекене соода 4,4 %га көбөйдү.
2026-жылдын январь-август айларында керектөө баалары жана тарифтер өткөн жылдын декабрына салыштырмалуу 7,6 %га өстү. Анын ичинде тамак-аш азыктары жана алкоголсуз суусундуктар 6,4 %га, алкоголдук ичимдиктер жана тамеки буюмдары 7,7 %га, азык-түлүк эмес товарлар 6,1 %га, калкка көрсөтүлгөн кызматтардын тарифтери 11,4 %га кымбаттады. Баалардын өсүшү өлкөнүн бардык аймактарында катталып, эң жогорку көрсөткүч Ош облусунда - 17,3 % болду.
Мындан тышкары, 2026-жылдын январь-июль айларында өлкөнүн товарлар менен тышкы жана өз ара соодасынын көлөмү 10 млрд долларды түзүп, былтыркы жылдын ушул мезгилине салыштырмалуу 7,7 %га көбөйдү.
ЕАЭБге мүчө мамлекеттер менен өз ара соода жүгүртүү 3,7 млрд долларды түзүп, 5,4 %га өстү. Анын ичинде экспорттук жөнөтүүлөр 2 %га төмөндөсө, импорт 7,2 %га көбөйгөн. ЕАЭБ өлкөлөрү менен өз ара соодада Орусиянын үлүшү 65,1 %ды, Казакстандын үлүшү 32,4 %ды түздү.
