Экономика министрлигинде 2026-жылдын мыкты ишкерлери сыйланды
18-сентябрда Кыргыз Республикасынын Экономика жана коммерция министрлигинде Ишкерлер күнүнө карата салтанаттуу иш-чара болуп өттү. Министрдин орун басары Беназир Нурланова ишкерлерди куттуктап, алардын экономиканын өнүгүшүнө, жаңы жумуш орундарын түзүүгө жана экспорттук потенциалды жогорулатууга кошкон салымын белгиледи.
Экономика министрлигинин маалыматына ылайык, 2025-жылдын жыйынтыгы боюнча чакан жана орто ишкердиктин ИДПдагы үлүшү 51,7%ды, түзүлгөн кошумча нарк 641 млрд сомго жакын болду.
2026-жылдын 6 айында ИДПдагы үлүшү 35,6%ды, дүң кошумча нарк 341,6 млрд сомду түзүп, былтыркыга салыштырмалуу 25,5%га өстү.
Иш-чарада ишкерлер төмөнкү номинациялар боюнча сыйланды:
- 2026-жылдын жаш ишкери — 3;
- 2026-жылдын ишкер айымы — 10;
- 2026-жылдын жашыл ишкер» — 7;
- 2026-жылдын компаниясы — 7;
- 2026-жылдын ишкери — 8.
Ошондой эле бир катар ишкерлерге министрликтин Ардак грамоталары жана ыраазычылык каттары тапшырылды.
Иш-чарага бизнес-ассоциациялардын өкүлдөрү да катышып, ишкердикти өнүктүрүү жаатындагы кызматташтыкты улантууга даяр экенин билдиришти.
