Аймактарда социалдык коргоо мекемелерин куруу, оңдоо иштери жүргүзүлүүдө
КРнын Эмгек, социалдык камсыздоо жана миграция министрлиги өлкөнүн аймактарында социалдык коргоо тутумунун жаңы мекемелерин куруу жана иштеп жаткан мекемелерди капиталдык оңдоо боюнча долбоорлор ишке ашырылып жатканын маалымдады.
Министрликтин билдирүүсүнө караганда, социалдык инфраструктураны өнүктүрүүнүн алкагында Кара-Кулжа райондук эмгек, социалдык камсыздоо жана миграция башкармалыгынын жаңы имараты курулууда.
Долбоорду ишке ашырууга КРнын Президентинин фондунан 114 млн сом бөлүнгөн. Мындан тышкары:
- Жакынкы аралыкта Чоң-Алай жана Ноокат эмгек, социалдык камсыздоо жана миграция башкармалыктарынын жаңы имараттарын куруу пландалууда.
- Беловодск балдар психоневрологиялык социалдык стационардык мекемесинин жаңы имаратын курууга Турукташтыруу фондунан 138,4 млн сом багытталган.
- Жайыл психоневрологиялык социалдык стационардык мекемесинде МинКаб Төрагасынын тапшырмасы боюнча капиталдык оңдоо иштери жүргүзүлүүдө. Бул максаттарга 54,8 млн сом каралган.
- Донордук каражаттардын эсебинен Ак-Суу психоневрологиялык социалдык стационардык мекемесин оңдоо иштери жүргүзүлүүдө. Аталган иштерди аткарууга 36 млн сом багытталган.
Министрлик бул долбоорлорду ишке ашыруу социалдык коргоо тутумундагы мекемелердин материалдык-техникалык базасын жакшыртууга, социалдык кызматтарды алган жарандар үчүн кыйла ыңгайлуу жана коопсуз шарттарды түзүүгө, ошондой эле кызматкерлердин эмгек шарттарын жакшыртууга багытталганын белгилейт.
Эмгек жана социалдык коргоо тутумунун социалдык инфраструктурасынын жаңы объекттерин каржылоо боюнча сунуштар - КРнын 2027-жылга жана 2028–2029-жылдарга пландалган мезгилге карата республикалык бюджетинин долбооруна киргизилди.
