Кыргызстанда этти ортомчусуз сатуу үчүн 100 соода түйүнү ачылат
Кыргызстанда этти ортомчусуз түз сатуу үчүн 100 соода түйүнүн ачуу пландалууда. Бул тууралуу Экономика жана коммерция министрлигинин басма сөз кызматынан кабарлашты.
Билдирүүгө караганда, бул чара азык-түлүк рыногунда бааларды турукташтыруу боюнча даярдалган 2026-2027-жылдарга карата пландын долбоорунда каралган.
"Соода түйүндөрү “Кыргыз Агрохолдинг” ААК тарабынан ачылып, этти өндүрүүчүлөрдөн керектөөчүлөргө түз жеткирүү механизми түзүлөт. Эт менен камсыз кылуу жана асыл тукум малдын санын жакшыртуу максатында, кеминде 20 миң баш бодо малды Казакстандан, Белорустан жана Россиядан импорттоо пландалууда" - деп айтылат маалыматта.
Соода түйүндөр - Бишкекте 30, Ош облусунда 15, Жалал-Абад облусунда 14, Чүй облусунда 12 түйүн ачуу каралган, калгандары башка аймактарда ачылышы күтүлөт.
Ошондой эле соода түйүндөрү үчүн жер тилкелерин акысыз берүү жана электр энергиясына кеткен чыгымдарды субсидиялоо маселеси каралууда.
