Быйыл социалдык объектилердин курулушуна 40 млрд сомдон ашык каражат каралды
2026-жылы Кыргызстанда социалдык объектилердин курулушуна жана оңдоп-түзөөгө республикалык бюджеттен жана Турукташтыруу фондунан жалпы 40 млрд 563 млн сом каралган. Бул тууралуу бүгүн, 14-октябрда Жогорку Кеңештин жыйынында Министрлер Кабинетинин төрагасынын орун басары Эрлист Акунбеков билдирди.
Анын айтымында, республикалык бюджеттен 509 объекттин курулушуна 17 млрд 818 млн сом, ал эми Турукташтыруу фондунан социалдык-маданий багыттагы 72 объектти курууга жана оңдоого 22 млрд 745 млн сом бөлүнгөн.
“Бул каражаттар өлкө боюнча социалдык инфраструктураны өнүктүрүүгө, саламаттыкты сактоо жана башка социалдык кызматтардын жеткиликтүүлүгүн жакшыртууга багытталган. Өзгөчө билим берүүгө көңүл бурулууда”, — деди Акунбеков.
Ошондой эле 2026-жылы республикалык бюджеттен жол куруу иштерине 35 млрд 505 млн сом бөлүнгөн. 10-октябрга карата өлкө боюнча 1668 чакырым жолдун курулушу аяктагандыгы белгиленди.
“Бишкек шаарындагы транспорт тыгындарын азайтуу үчүн сентябрь айынын аягына карата жалпы узундугу 154,2 чакырымды түзгөн 141 жол тилкесинде иштер башталган. Анын ичинен 65 тилкеде иштер уланууда”, - деп билдирди министр.
Мындан тышкары, Бишкекте узундугу 16,2 чакырымды түзгөн Чыгыш айланма жолун куруу долбоору ишке ашырылууда. Эми Батыш айланма жолун өнүктүрүү боюнча да трассаны аныктоо жана даярдык иштерин жүргүзүү маселелери каралууда.
