Кыргызстанда дан жана картошка түшүмү кескин өстү
Кыргызстанда 2026-жылы дан эгиндеринин, картошканын жана башка айыл чарба өсүмдүктөрүнүн түшүмү былтыркыга салыштырмалуу кыйла көбөйдү. Бул тууралуу Айыл чарба министрлиги маалымдады.
Билдирүүгө караганда, күзгү оруп-жыйноо өнөктүгү аягына чыгып калды. Дыйкандар 2,5 млн тоннага жакын дан жана 965 миң тонна картошка жыйнашты.
Чүй облусу дан жыйноо боюнча алдыда. Буудай жана арпа түшүмү дээрлик жыйналды. Дан үчүн өстүрүлгөн жүгөрү 671 миң тоннадан ашып, былтыркыдан эки эсеге көбөйдү. Жалпы дан былтыркыдан 714 миң тоннага көп жыйналды.
Өлкө боюнча 965 миң тонна картошка жыйналып, былтыркыдан 317 миң тоннага ашты. Негизги бөлүгү Ысык-Көл облусуна туура келет. Жашылча 891 миң тонна, бахча өсүмдүктөрү 240 миң тонна жыйналды.
Кант кызылчасынын үчтөн бир бөлүгү жыйналып, орточо түшүм гектарына 420 центнерди түздү. Түштүктө пахта жыйноо темпи былтыркыдан эки эсе жогорулап, кампаларга 16 миң тоннадан ашык пахта жеткирилди.
Түшүмдүн өсүшү ички рынокту азык-түлүк жана кайра иштетүү тармагын чийки зат менен камсыздоого өбөлгө түзөрү кошумчаланган маалыматта.
