Кыргызстанда дагы бир компания казино иштетүүгө лицензия алды
Кыргызстанда “Апекс Эйс” ЖЧКсы оюн ишмердүүлүгүн жүргүзүүгө лицензия алды. Тиешелүү уруксат 2026-жылдын 12-октябрында берилгендигин Экономика жана коммерция министрлигине караштуу Финансы рыногун жөнгө салуу жана көзөмөлдөө кызматы (Финкөзөмөл) билдирди.
Аталган мекеме Кыргызстанда казино иштетүүгө уруксат берилгени менен, өлкө жарандарына кумар оюндарына катышууга тыюу салынганын эскертет.
Мыйзамга ылайык, казинодо 21 жашка толгон чет өлкөлүк жарандар гана ойной алышат. Кыргызстандын жарандары оюн-зоок жайларынын кардарлары боло албайт. Бул талапты бузган жарандар мыйзамда каралган жоопкерчиликке тартылышы мүмкүн.
Ошондой эле «Укук бузуулар жөнүндө» кодекстин 346-беренесине ылайык, оюн-зоок ишин уюштуруучулар мыйзам талаптарын бузса, юридикалык жактарга 200 миң сом, ал эми оюн-зоок бизнесин жарнамалоо эрежелерин бузса, 45 миң сом айып пул салынат.
Финкөзөмөл жарандарды кумар оюндарына катышпоого жана тиешелүү уруксаты жок ишкердик субъекттери менен кызматташпоого чакырды.
