Бишкекте социалдык тармакты каржылоого жылына 823,8 млн сомдон ашат
Бишкекте 19-октябрда Социалдык коргоо кызматкерлеринин күнү белгиленди. Салтанат Токтоболот Абдумомунов атындагы драмтеатрда өттү. Бул тууралуу мэриядан билдиришти.
Маалым болгондой, иш-чарага вице-мэр Рахат Мусаева жана шаардык кеңештин депутаты Өмүркан Ашанбаева катышты.
Майрамдын алкагында социалдык тармактын мыкты кызматкерлерине мэриянын Ардак грамоталары жана ыраазычылык каттары тапшырылды.
Азыр борбор калаада 15 муниципалдык мекеме иштейт. Анда жалпы 691 кызматкер эмгектенет, анын 108и түздөн-түз элге барып жардам берген социалдык кызматкерлер. Алар жалгыз жашаган пенсионерлерге жана ден соолугунун мүмкүнчүлүгү чектелген жарандарга үйүнөн кызмат көрсөтүшөт.
Жыл сайын 59 миңден ашуун бишкектикке 20 түрдүү социалдык жардам көрсөтүлөт. Бул үчүн шаар бюджетинен 200 млн сом бөлүнөт. Ал эми тармакты каржылоонун жалпы жылдык көлөмү 823,8 млн сомдон ашат.
