Өлкөгө 9,6 млн сомдук 376 зер буюмду мыйзамсыз алып кирүүгө бөгөт коюлду
"Манас" эл аралык аэропортунда баасы 9,6 млн сомдон ашкан зер буюмдарды мыйзамсыз алып кирүү аракетине бөгөт коюлду. Бул тууралуу Мамлекеттик салык кызматынан кабарлашты.
Маалыматка караганда, текшерүүдө коштомо документи жок 376 зер буюм табылган. Анын ичинен 147си алтын буюм, салмагы 396 грамм, ал эми 229у күмүш буюм, салмагы 1 кг 979 граммды түзөт.
Бул факты боюнча административдик айып пул салынды жана мыйзамдагы тиешелүү жол-жоболор жүргүзүлдү.
Салык кызматы зер буюмдарды ташууда мыйзам талаптарын сактоо зарылдыгын эскертет.
