Кыргызстан 2030-жылга чейин жылдык экономикалык өсүштү кеминде 8% сактоону көздөйт
Кыргызстан 2030-жылдын аягына чейин ички дүң продуктунун реалдуу өсүшүн жылына кеминде 8% деңгээлинде сактоону көздөйт. Ошондой эле чет өлкөлүк түз инвестициялардын агымын жыл сайын 20%га көбөйтүү максаты коюлду. Бул тууралуу президент Садыр Жапаров бүгүн Бишкек шаарында өткөн республикалык кеңешмеде билдирди.
Мамлекет башчысы алдыдагы беш жылда өлкөнүн социалдык-экономикалык өнүгүүсүнүн негизги багыттарын белгилеп, экономикалык туруктуулукту камсыз кылуу, инвестицияларды тартуу жана өндүрүштү өнүктүрүү артыкчылыктуу милдеттерден болорун айтты.
Анын белгилешинче, экономикалык өсүштүн негизин экспортко багытталган сервистик-индустриалдык модель түзөт. Ал экспорттолуучу кызмат көрсөтүүлөргө жана кошумча наркы жогору өнөр жай продукциясын өндүрүп, тышкы рынокторго чыгарууга таянат.
Президент Министрлер кабинетине жана борбордук мамлекеттик органдарга белгиленген максаттарга жетүү үчүн тиешелүү чараларды көрүүнү тапшырды.
