Ош облусунда мыйзамсыз кум-шагыл казгандарга айып салынды
Ош облусунда мыйзамсыз кум-шагыл казуу фактылары аныкталып, жалпы 60 миң сом айып пул салынды. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, Кара-Суу районундагы Папан суу сактагычында жүргүзүлгөн рейд учурунда уруксат документтери жок кум-шагыл казуу фактысы аныкталып, 20 миң сом айып салынган.
Ошондой эле Өзгөн районунун Салам-Алик айыл аймагындагы Жазы дарыясынын жээгинен мыйзамсыз кум-шагыл казган жарандарга жалпы 40 миң сом айып пул салынып, колдонулган техникалар дарыянын нугунан чыгарылган.
Мындан тышкары, Папан суу сактагычынын администрациясына жана айыл өкмөтүнө аймакты таштандылардан тазалоо боюнча эскертүүлөр берилген.
Рейд учурунда балыкчыларга экологиялык талаптарды жана балык уулоо эрежелерин сактоо боюнча түшүндүрүү иштери жүргүзүлгөн.
