Баткен электр тармактары күз-кышка толук даярдык көрдү

Баткен электр тармактар ишканасы 2025-2026-жылдардагы күз-кыш мезгилине карата даярдык иштерин толугу менен аткарды. “Кыргызстан УЭТ” ААКнын филиалы аба чубалгыларын оңдоп-түзөө, эски жабдууларды жаңылоо жана жаңы көмөк чордондорду куруу иштерин өз мөөнөтүндө бүткөрдү.

Энергетика министрлигинин маалыматына ылайык, облустун бардык аймактары жана шаарлары электр энергиясы менен үзгүлтүксүз камсыздалды. Жаңы конуштарга электр тартылып, көчөлөр жарыктандырылды, ал эми эски алюминий зымдар заманбап СИП зымдарга алмаштырылды. Ошондой эле акылдуу эсептегичтер орнотулуп, трансформаторлор жана аба чубалгылар оңдоп-түзөөдөн өткөрүлдү.

Бул иштер кыш мезгилинде электр жабдууларынын ишенимдүүлүгүн жана туруктуулугун камсыз кылууга өбөлгө түзөт. Баткен РЭТ калкты сапаттуу жана үзгүлтүксүз электр энергиясы менен камсыздоону улантууда.