Электр тармагынын кампасынан материалдык баалуулуктар жоголуп жаткан
Улуттук коопсуздук мамлекеттик кызматы Ош электр тармактары ишканасынын кампасынан материалдык баалуулуктарды системалуу түрдө ыйгарып алуу жана мыйзамсыз сатуу фактысын аныктады. Бул тууралуу аталган кызматтан маалымдашты.
Маалыматка ылайык, борбордук кампанын башчысы М.А.М. узак убакыт бою өзүнө ишенип тапшырылган, электр берүү линияларын оңдоо жана эксплуатациялоо үчүн арналган АС-95, АС-185 жана АС-300 маркасындагы алюминий зымдарын мыйзамсыз сатып турган.
Мыйзамсыз аракеттердин натыйжасында ишканага ири өлчөмдө материалдык зыян келтирилген. Кампадагы материалдык запастардын жетишсиздиги Ош облусунун энергетикалык инфраструктурасын 2026–2027-жылдардын күз-кыш мезгилине даярдоо алкагында оңдоо иштерин өз убагында жүргүзүүгө тобокелдиктерди жараткан.
Учурда окуянын бардык жагдайларын аныктоого, уурдоонун кошумча фактыларын жана мыйзамсыз ишмердүүлүккө тиешеси бар башка адамдарды аныктоого багытталган тергөө-ыкчам иш-чаралары жүргүзүлүүдө, деп билдиришти УКМКдан.
Күндүн негизги жаңылыктары — Telegram каналыбызда
Каналга катталуу
