Кыргызстанда электр энергиясынын тарифтерин эсептөө эрежелери өзгөрөбү?
Энергетика министрлиги "Электр энергиясын бөлүштүрүүчү ишканалар үчүн электроэнергетика тармагындагы айрым маселелер жөнүндө" 2022-жылдын 12-сентябрындагы документке өзгөртүүлөрдү киргизүү тууралуу буйруктун долбоорун коомдук талкууга чыгарды.
Документке ылайык, бөлүштүрүүчү ишканалардын чыгымдарын эсептөө ыкмасын өзгөртүү жана негизги жеткирүүчүдөн электр энергиясын сатып алуу үчүн бирдиктүү тариф киргизүү пландалууда. Бул тариф импорттолгон электр энергиясынын орточо салмакталган баасына жана аны тармактар аркылуу жеткирүү чыгымдарына жараша эсептелет.
Министрликтин маалыматына ылайык, мындай өзгөртүүлөргө муктаждык энергетика тармагындагы учурдагы кырдаалга байланыштуу.
Маалыматтарга караганда:
- 2025-жылы Кыргызстанда электр энергиясынын тартыштыгы болжол менен 3,8 млрд киловатт-саатты түзөт;
- ал эми тармактагы каржылык тартыштык болжол менен 4,6 млрд сомго бааланууда.
Долбоордо бир нече сценарий каралган:
1.Электр энергиясы импорттолсо — бөлүштүрүүчү компаниялар үчүн тариф сатып алынган энергиянын жалпы баасы жана аны өткөрүү чыгымдарынын негизинде формула боюнча эсептелет.
2.Импорт токтотулса — тариф кайра жаралуучу энергия булактарынан электр энергиясын өндүргөн ишканалар үчүн белгиленген чектүү тарифтерге жараша аныкталат.
3.Импорт да, кайра жаралуучу энергия булактары да болбосо — бөлүштүрүүчү ишканалардын чыгымдары негизги (базалык) методика боюнча эсептелет.
Мындан тышкары, документте энергетикалык компаниялардын пайдасынан каржыланган чыгымдардын бир бөлүгү төмөнкү иштерге багытталышы керектиги такталган:
- электр тармактарын өнүктүрүү
- инфраструктураны модернизациялоо
- объектилерди реконструкциялоо
- техникалык кайра жабдуу
Мындай чыгымдар бекитилген инвестициялык программа болгон учурда гана эсепке алынат.
Буйруктун долбоору Энергетика министрлигинин расмий сайтына жана нормативдик-укуктук актыларды коомдук талкуулоо порталына жайгаштырылган. Ал жерде жарандар жана эксперттер өз сунуштарын жана сын-пикирлерин жибере алышат.
