КРнын бажы кызматы АКШ өкүлдөрү менен радиациялык коопсуздук боюнча кызматташууну талкуулады
Кыргыз Республикасынын Министрлер Кабинетине караштуу Мамлекеттик бажы кызматында МБКнын төрагасынын орун басары Э.Р. Мамбетжунушева менен Америка Кошмо Штаттарынын Энергетика министрлигинин жана Ядролук коопсуздук боюнча улуттук администрациясынын “Ядролук материалдардын контрабандасын аныктоо жана бөгөт коюу” программасынын өкүлдөрүнүн жолугушуусу өттү.
Аталган кызматтын билдирүүсүнө караганда, жолугушуунун жүрүшүндө тараптар радиациялык көзөмөл тармагындагы учурдагы жана келечектеги кызматташтык маселелерин талкуулашты. Айрыкча, бажы органдарынын кызматкерлеринин кесиптик даярдыгын жогорулатууга өзгөчө көңүл бурулду.
Маалыматка ылайык, кызматкерлер үчүн жыл сайын уюштурулуп келген адистештирилген тренингдерди улантуу, ошондой эле 2026-жылдын үчүнчү чейрегинде Кыргызстандын өнөктөш уюмдары үчүн “Жумуш ордунда окутуунун негиздери” аттуу окуу программасын өткөрүү пландалууда.
Тараптар радиациялык коопсуздукту камсыз кылуу, ядролук жана радиоактивдүү материалдардын мыйзамсыз жүгүртүлүшүнө каршы күрөшүү багытындагы кызматташтыкты мындан ары да бекемдөөгө кызыкдар экенин белгилешти.
