Энергетика

Айбек Жунушалиев "Бишкек ЖЭБдин" кышка даярдыгын текшерди

Уулжан Бейшенбекова

13 авг 2026 19:25

13-августта Бишкек шаарынын мэри Айбек Жунушалиев "Бишкек ЖЭБ" муниципалдык ишканасына барып, анын учурдагы ишмердүүлүгү жана күз-кышка даярдыгы менен таанышты. Бул тууралуу мэриянын басма сөз кызматы билдирди.

Маалыматка ылайык, мэр өндүрүштүк объектилердин техникалык абалын, ишканаларды отун менен камсыздоо жана оңдоо иштеринин жүрүшүн көзөмөлдөдү.

Көчмө жыйындын алкагында "Бишкек ЖЭБ" ишканасында кеңешме өткөрүлүп, негизги энергетикалык жабдууларды оңдоого, отун корун даярдоого, жылуулук тармактарынын абалына жана керектөөчүлөрдү жылуулук менен камсыз кылууга өзгөчө көңүл бурулду.

Айбек Жунушалиев тиешелүү жетекчилерге кышка даярдыкты өз убагында жана сапаттуу аяктоо, энергетикалык жана жылуулук объектилеринин техникалык даярдыгын камсыз кылуу боюнча тапшырмаларды берди.

Ошондой эле шаар тургундарын жылуулук жана электр жарыгы менен туруктуу камсыз кылуу үчүн тиешелүү кызматтардын биргелешип иш алып баруусунун маанилүүлүгү белгиленди.

Кыргызстандын экономика, бизнес, финансы тармактары боюнча маалыматтарды, ийгиликтүү ишкерлер менен болгон кызыктуу маектерди – Ишкер MEDIA сайтынын Telegram, Facebook, Instagram, Threads, Х жана YouTube каналдарынан окуп, көрүп туруңуздар. Ишкер MEDIA менен Сиз ийгиликке жетишесиз!