Лебединовка ГЭСин реконструкциялоого даярдык башталды
Лебединовка ГЭСин реконструкциялоого даярдык көрүлүп, станцияда адистер жана жумушчулар үчүн убактылуу шаарча курула баштады. Бул тууралуу "Чакан ГЭС" ААКтан билдиришти.
Курулуш иштерин башкы подрядчы — China National Heavy Machinery Corporation (CHMC) компаниясы жүргүзүүдө. Убактылуу шаарчанын курулушу ГЭСте негизги курулуш-монтаждоо жана реконструкциялоо иштерин баштоого даярдыктын биринчи этабы болуп саналат.
Долбоордун алкагында станциянын негизги жабдуулары толугу менен модернизацияланат. Реконструкция аяктагандан кийин ГЭСтин орнотулган кубаттуулугу 7,6 МВттан 10 МВтка чейин жогорулайт.
Ошондой эле электр энергиясын жылдык өндүрүү көлөмү азыркы 37,2 млн кВт/сааттан 53,5 млн кВт/саатка чейин көбөйөт.
Лебединовка ГЭСин реконструкциялоо Энергетика министрлигинин гидроэлектр станцияларын модернизациялоо программасынын алкагында жүргүзүлүүдө.
Маалыматка ылайык, Лебединовка ГЭСи Чүй облусундагы эң байыркы иштеп жаткан гидроэлектр станцияларынын бири. Анын курулушу 1942-жылдын май айында башталып, 1943-жылы пайдаланууга берилген.
