Кырчында энергетиктер 24 сааттык нөөмөттө кызмат өтөп жатышат
Энергетика министри Алтынбек Рысбеков VI Дүйнөлүк көчмөндөр оюндары өтүп жаткан "Кырчын" этно-шаарчасына барып, энергетиктердин ишин текшерди.
Иш сапардын жүрүшүндө министр көмөк чордондордун, электр берүү чубалгыларынын, тутумдардын жана кошумча энергия булактарынын көрүп чыкты. Ошондой эле энергетиктердин 24 сааттык нөөмөтүнүн уюштурулушун көзөмөлгө алды.
Министрликтин маалыматына ылайык, Дүйнөлүк көчмөндөр оюндарынын күндөрү энергетиктер күчөтүлгөн тартипте иш алып барууда. Бишкек шаарындагы жана Чүй облусундагы оюндардын объектилеринде 250дөн ашык адис күнү-түнү нөөмөттө кызмат өтөп жатат.
Мындан тышкары, Чүй, Жалал-Абад, Талас жана Нарын облустарында 300дөн ашык энергетик тартылган.
Белгиленгендей, негизги аянтчалар, анын ичинде "Кырчын" этно-шаарчасында, ат майданда жана Ысык-Көл облусундагы башка иш-чаралар өтүп жаткан жайлар жарык менен үзгүлтүксүз камсыздалууда.
Иш сапарынын соңунда Алтынбек Рысбеков кызматкерлерге ыраазычылык билдирип, Дүйнөлүк көчмөндөр оюндары өтүп жаткан мезгилде энергетика тармагынын адистерине чоң жоопкерчилик жүктөлөрүн белгиледи.
