Дүйнөлүк банк КРнын энергетика тармагына 50 млн доллар берет, каражаттын жарымы - кредит
Энергетика министрлиги “Электр энергетикасын модернизациялоо жана туруктуу өнүктүрүү” долбоорунун алкагында Дүйнөлүк банк КРга 25 млн доллар өлчөмүндө гранттык жардам берерин билдирди.
Министрлик ошондой эле Швейцариянын Экономикалык маселелер боюнча мамлекеттик катчылыгынын (SECO) грант түрүндө кошумча 8 млн долларды тартуу маселесинин үстүндө иштеп жатат.
Бүткүл дүйнөлүк банктын 25 млн долларлык каржылоосунун калган бөлүгү 38 жылдык мөөнөткө, жылдык 0.75% минималдуу ставка менен жана келишимге кол коюлган күндөн тартып алты жыл жеңилдетилген насыя болуп саналат.
Кыргызстандын энергетика тармагына жалпысынан 58 млн доллар тартылат. Ошол эле учурда 2060-жылга карата каражаттардын кайтарымы 28 млн долларды (3 млн доллар пайыздык төлөм) түзөт жана 30 млн доллар гранттык каражат аталган тармакты өнүктүрүүгө багытталат.
Бул каражаттар бөлүштүрүүчү тармактарды реабилитациялоого, модернизациялоого жана санариптештирүүгө, ошондой эле социалдык коргоо тутумун чыңдоого жумшалат. Долбоорду ишке ашыруунун натыйжасында республикада энергетика тармагын туруктуу өнүктүрүү жана ири долбоорлорду ишке ашыруу үчүн зарыл шарттар түзүлөөрү күтүлүүдө.
- Маалыматка таянсак, учурда техникалык тапшырмаларды даярдоо, сатып алуулар, ошондой эле аталган долбоорду каржылоо боюнча макулдашуунун күчүнө кириши үчүн мамлекеттик ички жол-жоболорду даярдоо иштери жүрүп жатат.
