Кувейт мамлекети берген 174 млн сомго Эне жана баланы коргоо улуттук борборунун жаңы бөлүмү ачылды
Кувейт мамлекети жана «Ас-Сафа борбору» коомдук бирикмесинин каржылык колдоосу менен Эне жана баланы коргоо улуттук борборунун отоларингология жана офтальмология бөлүмдөрү негизделген жаңы имаратынын ачылышы болду. Бул тууралуу минкабдын маалымат кызматы билдирди.
Оорукананын ачылыш аземине катышкан министрлер кабинетинин башчысы Акылбек Жапаров Кувейт мамлекетине жана «Ас-Сафа борбору» коомдук бирикмесине жаңы имараттын курулушу үчүн ыраазычылык билдирди.
Бөлүмдөр заманбап жабдуулар менен жабдылган жана эл аралык стандарттарга жооп берет.
Акылбек Жапаров белгилегендей, буга чейин “Ас-Сафа борбору” коомдук бирикмеси тарабынан Улуттук борбордо диагностикалык клиника, кан оорулары жана трансплантация бөлүмү, балдар онкологиясы жана гематология бөлүмү курулган.
Отоларингология жана офтальмология бөлүмдөрү жайгашкан аянты 3293 чарчы метр болгон 5 кабаттуу имаратты курууга жана жабдууга «Ас-Сафа борбору» коомдук бирикмеси тарабынан 174.5 млн сом бөлүнгөн.
Мындан тышкары, уюм Эне жана баланы коргоо улуттук борборунун аймагында сметалык наркы 120 млн сомдук 3 кабаттуу имараттын курулушун бүткөрүүгө даяр экендигин тастыктады.
