ЕРӨБ Оштун мэриясына 70 автобустун ордуна 56 гана сатып алууну сунуштады
Ош шаарынын мэриясы Европа реконструкциялоо жана өнүктүрүү банкынын (ЕРӨБ) өкүлдөрү менен жолугушуусу болуп өттү. Бул тууралуу мэриянын маалымат кызматы кабарлады.
Жолугушууда тараптар «Ош шаарынын коомдук электр транспорт системасын модернизациялоо» долбоорун ишке ашыруунун жүрүшүн талкуулашты. Улуу Британиянын Atkins компаниясынын кеңешчилери тарабынан даярдалган долбоордун техникалык-экономикалык негиздемесинин жыйынтыктары менен да таанышты.
ЕРӨБ Евразия инфраструктурасы департаментинин өкүлү Нургүл Кудранова “Atkins” компаниясынын кызматкерлери жүргүзгөн ички жана тышкы изилдөөдөн соң 19 электр автобустарын жана 37 аккумулятордук троллейбустарды сатып алуу аркылуу долбоорду ишке ашыруу сунушун берди.
Жолугушуунун алкагында Atkins компаниясы тарабынан жүргүзүлгөн иликтөөнүн жыйынтыктары тааныштырылды. Жолугушуунун жыйынтыгында сунушталган долбоорду биргеликте дагы да терең изилдөө боюнча макулдашылды.
