Индия Кыргызстандагы долбоорлорду колдоо үчүн 126,6 млн сом грант бөлөт
Бүгүн, Экономика жана коммерция министрлигинде эки тараптуу меморандумга кол коюу аземи болду. Бул тууралуу министрликтин маалымат кызматынан билдиришти.
Биринчиси – Индиянын Тышкы иштер министрлиги, Экономика жана коммерция министрлиги жана Илим, жогорку билим берүү жана инновациялар министрлиги ортосунда түзүлгөн "Бишкек шаарында Кыргыз экономикалык университети (КЭУ) үчүн IT Lab түзүү" долбоору.
Экинчиси – Индиянын Тышкы иштер министрлиги, Экономика жана коммерция министрлиги жана Президенттин Баткен облусундагы өкүлчүлүгү ортосундагы "Баткен облусунун Лейлек районундагы жалпы дарыгердик практика борборунун техникалык базасын жана инфраструктурасын жакшыртуу" долбоору.
Меморандумдарга Индия тараптан Кыргызстандагы Атайын жана Ыйгарым укуктуу элчиси Бирендер Сингх Ядав, Кыргыз тараптан Экономика жана коммерция министри Бакыт Сыдыков, Илим, жогорку билим берүү жана инновациялар министри Бактияр Орозов, ошондой эле Баткен облусундагы ыйгарым укуктуу өкүлдүн орун басары Жаныбек Исаков кол коюшту.
Ар бир долбоорго Индия тараптан 126,6 млн сомдон грант бөлүнөт.
