"Кара-Балта – Чалдовар" автожолун реконструкциялоо үчүн 15 млн евро грант макулдашылды
Транспорт жана коммуникациялар министринин орун басары Бекназар Базаралиев Өзбекстандын Ташкент шаарында өткөн Транскаспий транспорт коридору жана өз ара байланыш боюнча инвесторлор форумуна катышты.
Министрликтин маалыматына ылайык, иш-чарада ал Европа Биримдигине жана Өзбекстан Өкмөтүнө жогорку деңгээлде уюштургандыгы үчүн ыраазычылык билдирди.
Бекназар Базаралиев Транскаспий транспорт коридорун өнүктүрүүнүн Кыргызстан үчүн стратегикалык маанисине токтолуп, бул багыт эл аралык жана региондук байланыштарды бекемдөөгө, экспорттук мүмкүнчүлүктөрдү кеңейтүүгө, ошондой эле өлкөнүн транспорттук инфраструктурасын жаңылоо иштерине түздөн-түз байланышта экенин белгиледи. Ал ошондой эле эл аралык донорлордун, анын ичинде Европа реконструкция жана өнүктүрүү банкынын (ЕРӨБ) салымын баса белгиледи.
Форумдун алкагында ЕРӨБ жана Европа банкы менен "Кара-Балта – Чалдовар" автожолун реконструкциялоо долбоору үчүн 15 миллион евро грант жана техникалык колдоо боюнча макулдашууга кол коюлду.
Ошондой эле Базаралиев Евробиримдиктин Кыргызстандагы элчиси Реми Дюфло жана Чехиянын транспорт министри Мартин Купка менен эки тараптуу жолугушууларды өткөрүп, транспорт тармагындагы кызматташтыкты тереңдетүү, инфраструктуралык долбоорлорду өнүктүрүү, логистика жана транзиттик мүмкүнчүлүктөрдү кеңейтүү маселелерин талкуулашты.
Министрлик транспорттук инфраструктураны модернизациялоо жана региондук транзиттик потенциалды кеңейтүүгө багытталган демилгелерди улантууда.
