Мамлекеттик питомниктерди жаңылоо үчүн 534 миң долларлык грант берилет
Бүгүн Суу ресурстары, айыл чарба жана кайра иштетүү өнөр жайы министрлигинде көчөт өстүрүү боюнча мамлекеттик питомниктерди өнүктүрүүгө гранттык каражаттар бөлүнүп, гранттык келишимдерге кол коюлду. Жалпы каржылоонун көлөмү 534 миң АКШ доллары түзөт. Бул тууралуу ведомстводон билдиришти.
Иш-чара "Регионалдык жайыт жамааттарынын туруктуулугу – АДАПТ" долбоорунун алкагында уюштурулду. Конкурстун жыйынтыгында Ош токой чарбасы, Чоң-Кемин мамлекеттик жаратылыш паркы, Кара-Кулжа токой чарбасы жана Кыргыз улуттук агрардык университети жеңүүчү деп табылып, гранттык келишимдерге кол коюлду. Конкурска 16 арыз түшкөн, катышуунун негизги шарттары катары кеминде 5 гектар жер тилкеси жана бизнес-план талап кылынган.
Министрдин биринчи орун басары Жаныбек Керималиев белгилегендей, заманбап питомниктер токойлорду калыбына келтирүү жана экологияны жакшыртуу боюнча инвестиция гана эмес, экосистемаларды калыбына келтирүүнүн негизин түзөт. Айыл чарба долбоорлорун ишке ашыруу бөлүмүнүн директору Тамчыбек Тулеев кошумчалады: “Питомниктер региондор үчүн туруктуу көчөт өндүрүү булагы болуп, өлкөнүн "Жашыл Мурас" программасын колдоого шарт түзөт”.
Долбоордун алкагында питомниктер жылына 2 миллионго чейин көчөт (жаңгак, мөмө-жемиш жана кооздук дарактар) өндүрүүгө мүмкүндүк алат. Өндүрүлгөн көчөттөр токой чарбаларына, токой пайдалануу субъекттерине жана башка кызыкдар тараптарга берилет.
