Абанын сапатын жакшыртуу үчүн 50 млн доллар тартылат
Жаратылыш ресурстары, экология жана техникалык көзөмөл министри М. Машиев Кыргыз Республикасындагы Дүйнөлүк банктын өкүлчүлүгүнүн башчысы Хью Риддл жана банктың Европада жана Борбордук Азиядагы айлана-чөйрө маселелери боюнча адистери менен жолугушуу өткөрдү. Бул тууралуу ведомстводон билдиришти.
Жолугушууда Дүйнөлүк банк өкүлдөрү Кыргызстанда экология тармагында жүргүзүлүп жаткан реформаларды жана биргелешкен долбоорлордун жыйынтыктарын жогору баалап, натыйжалуу кызматташтык үчүн ыраазычылык билдиришти.
Министр М. Машиев климаттык күн тартибин ишке ашыруу, тоо экосистемаларын коргоо жана Ысык-Көлдүн биосфералык аймагын сактоо боюнча аткарылып жаткан иштер тууралуу маалымат берди.
Тараптар ошондой эле атмосфералык абанын сапатын жакшыртууга багытталган 50 млн АКШ долларлык долбоордун алкагында тазалоочу курулмаларды модернизациялоо жана биологиялык ресурстарды сактоо маселелерин талкуулашты.
Жолугушуунун жыйынтыгында экология тармагындагы кызматташтыкты мындан ары да бекемдөө боюнча макулдашууга жетишилди.
