Дары-дармек өндүрүүчүлөр 10–12 жылга жеңилдетилген насыя ала алышат
1-июлда Экономика жана коммерция министрлигинде Саламаттык сактоо министрлигинин, Мамлекеттик өнүктүрүү банкынын, коммерциялык банктардын жана ата мекендик фармацевтикалык ишканалардын өкүлдөрүнүн катышуусунда жумушчу кеңешме өттү.
Экономика министрлиги билдиргендей, жолугушууда Министрлер кабинети 23-июнда №472-т тескемеси менен бекиткен "Дары-дармек каражаттарын жана медициналык буюмдарды өндүрүүчүлөргө жеңилдетилген насыя берүү" долбоорун ишке ашыруу маселеси каралды.
Долбоордун алкагында ишканалар жеңилдетилген каржылоону өндүрүштү жаңылоо, жаңы жабдууларды сатып алуу, лабораторияларды түзүү жана башка багыттарда колдоно алышат.
Ишканалар "Кыргыз Республикасынын Мамлекеттик өнүктүрүү банкы", "АБанк" жана "Элдик Банк" аркылуу жеңилдетилген насыяларды жылдык 3 жана 5%дык чендер менен, тиешелүүлүгүнө жараша 10 жана 12 жылга чейинки мөөнөткө ала алышат. Негизги карызды төлөө боюнча 24 айга чейинки мезгил каралган.
Кеңешменин жүрүшүндө долбоорду ишке ашыруу механизмдери, каржылоо шарттары жана арыз берүү тартиби тууралуу маалымат берилди. Катышуучулар программанын фармацевтика тармагын өнүктүрүүгө олуттуу түрткү берерин белгилешти.
