Аймактардагы ишкерлерге 2%дык үстөк менен 20 млн сомго чейин насыя берилет
“Мамлекеттик финансылык холдинг” ачык акционердик коому өлкө аймактарынын экономикасын өнүктүрүүгө багытталган долбоорун ишке киргизди. Бул тууралуу Каржы министрлигинин басма сөз кызматы билдиришти.
Маалыматка ылайык, долбоордун алкагында туризм, жеңил өнөр жай, өндүрүш, саламаттык сактоо, билим берүү, энергетика, ошондой эле айыл чарба өндүрүмүн кайра иштетүү жана сактоо багыттарындагы долбоорлор каржыланат.
Каржылоого жеке ишкерлер, юридикалык жактар жана башталгыч долбоорлору бар талапкерлер катыша алышат. Насыялар жылдык 2%дык чен менен берилип, суммасы 20 млн сомго чейин, мөөнөтү 10 жылга чейин белгиленген. Ошондой эле негизги карызды төлөө боюнча 12 айга чейин жеңилдетилген мөөнөт каралган.
Каржы министрлиги менен биргеликте ишке ашырылып жаткан долбоор аймактардагы өндүрүштү өнүктүрүүгө, ишканаларды жаңылоого, инвестиция тартууга жана өлкөнүн экономикалык мүмкүнчүлүктөрүн жогорулатууга багытталганы айтылды.
