Экологиялык таза жылытуу: 6% менен 5 жылга чейин насыя берилет
Бишкек шаары жана Чүй облусунда жеке менчик үйлөрдүн ээлерине экологиялык таза жылытуу системаларын орнотуу үчүн жеңилдетилген насыя берүү уланууда. Бул тууралуу Финансы министрлигинин долбоорлорун ишке ашыруу бөлүмү билдирди.
Маалыматка ылайык, жарандар жылуулук насосторун жана энергияны үнөмдөөчү башка жабдууларды сатып алып, орнотууга жылдык 6% менен беш жылга чейин 1 млн сомго чейин насыя ала алышат.
Каржылоо "АБанк", "Элдик Банк" жана "Бакай Банк" аркылуу жүргүзүлөт. Долбоор жеке сектордо көмүр жагуудан чыккан зыяндуу заттарды азайтып, абанын сапатын жакшыртууга багытталган.
Маалыматка ылайык, бул боюнча Маевка айылында тургундар үчүн маалыматтык жолугушуу өткөн. Ага Бишкектин Биринчи май районундагы 15тен ашык конуштун, анын ичинде "Ак-Босого", "Калыс-Ордо", "Көлмө", "Мурас-Ордо", "Тынчтык", "Аска-Таш" жана башка аймактардын жашоочулары катышкан.
Белгиленгендей, маалыматтык жыйындар "Кыргыз Республикасында абанын сапатын жакшыртуу" долбоорунун алкагында башка райондордо да өтөт.
