Оштогу ооруканага 11,5 млн долларлык медициналык жабдык берилет
Япониянын JICA эл аралык кызматташтык агенттиги гранттык негизде Ош облустар аралык бириккен клиникалык ооруканасына жалпы баасы 11,5 млн АКШ долларын түзгөн медициналык жабдыктарды берет. Бул тууралуу бүгүн Президенттин Ош облусундагы ыйгарым укуктуу өкүлү Аманкан Кенжебаев ооруканага болгон иш сапарынын алкагында билдирди.
Иш сапарга Жогорку Кеңештин "Ала-Тоо" депутаттык тобунун жетекчиси Таалайбек Масабиров жана депутаттар да катышты.
Жолугушууда JICA тарабынан бериле турган медициналык жабдууларды жайгаштыруу маселеси талкууланды. Анын алкагында ангиограф жана компьютердик томограф аппараттарын орнотуу үчүн кошумча имарат куруу пландалды.
Мындан тышкары, делегация капиталдык оңдоодон өткөн бөлүмдөр менен таанышып, оорукананын эмгек жамааты менен жолугушуу өткөрдү.
Маалыматка ылайык, JICA долбоорунун алкагында ооруканага 31 түрдүү, жалпы 130 даана медициналык жабдык жеткирилет. Алардын жалпы сметалык баасы 11,5 млн АКШ долларын түзөт.
