Токтогулда суу быйыл былтыркыдан 2.9 млрд куб метрге аз. Энергетиктер электр жарыгын үнөмдөөгө чакырат
Быйыл Нарын дарыясындагы суунун агып келиши аз болду. Өткөн жылы суунун көлөмү 14 млрд 745 млн кубду түзсө, быйыл 11 млрд 868 млн куб болду, ортодо 2.9 млрд куб метр суу айырма болууда. Бул тууралуу «Электр станциялар» мекемесинин техникалык өндүрүш бөлүмүнүн башчысынын орун басары Азим Жумаев бүгүн, 4-ноябрда «Биринчи радионун» эфиринде билдирди жана ал кыргызстандыктарды электр жарыгын үнөмдөөгө чакырды.
Анын айтымында, энергетиктердин эсебинде бир жылда 1 млрд кВт/с электр кубатын үнөмдөсө болот, бирок азыр электр энергиясын пайдалануу чектен ашып кетти, анткени керектөөчүлөрдүн саны өсүүдө. Буга байланыштуу мамлекет импорт маселесин карап келет.
«Түркмөнстандан 500 млн кВт электр энергиясын алуу боюнча келишим түзүлгөн. Ошондой Казакстан жана Өзбекстандан товар алмашуу негизинде алабыз, алар бизге кышта берет, биз аларга жайкысын кайтарабыз. Анын көлөмү 1млрд 650 млн кВт/с каралган. Өзбекстан быйыл берген планын аткарды, Казакстан болсо график боюнча жеткирүүнү жүргүзүп жатат. Бишкек ЖЭБ быйыл 2-3 млрд кВт/с электр энергиясын өндүрүүсү күтүлүүдө. Ошол эле 2020-жылы аталган ЖЭБ 1 млрд кВт/с өндүргөн, быйыл эки эсе көп өндүрүү пландалууда», – деди ал.
Ошондой эле Азим Жумаевдин билдиришинче, мурда белгилүү болгондой быйыл Нарын дарыясындагы суунун агып келиши аз болгон. Бул көрүнүштү ал суунун агуу циклине байланыштырды.
«Токтогул суу сактагычындагы суу быйыл 11 млрд 868 млн кубду түзсө, былтыры 14 млрд 745 млн кубду түзгөн, бул демек, 2.9 млрд суу айырма болууда. Токтогул суу сактагычынан чыккан суу кайрадан каскаддык Курук-Сай, Таш-Көмүр, Шамалды-Сай жана Үч-Коргон ГЭСтерине турбина аркылуу өтөт. Суунун агуу циклдери бар, мисалы, 4-5 жыл суу жакшы келсе, кийинки жылдары аз келүү коркунучтары бар», – деди ал.
Энергетика тармагындагы эксперт Эрнест Карыбековдун айтымында, күз-кыш жылытуу мезгилинде электр энергиясын суткалык керектөө 60 млн кВт/сааттан ашса, ноябрдан мартка чейин Кыргызстан 9 млрд кВт/саатка жакын электр энергиясына муктаж.
