Бишкекте өткөн ишембиликте 230 тоннадан ашык таштанды чыгарылды
25-апрелде өткөн жалпы шаардык ишембиликке 36 миңден ашык шаар тургуну катышты. Биргелешкен аракеттердин натыйжасында 230 тоннадан ашык таштанды жыйналып, ошондой эле 48 чакырымдан ашуун ирригациялык тармактар тазаланды. Бул тууралуу шаардык мэриянын басма сөз кызматы билдирди.
Маалымтка карганда, санитардык тазалоо иштери короолордо, парктарда, скверлерде жана социалдык объекттердин айланасын камтыды. Айрыкча ирригациялык инфраструктураны калыбына келтирүүгө өзгөчө көңүл бурулууда. Бул жаз-жай мезгилинде бак-дарактарды сактоо үчүн маанилүү кадам болуп саналат.
Бишкек шаарынын мэриясы ишембиликке активдүү катышкан бардык тургундарга ыраазычылык билдирет.
Муниципалитет шаар тургундарын жана уюмдарды эки айлыктын алкагындагы иш-чараларга мындан ары да активдүү катышууга, тазалыкты сактоого жана айлана-чөйрөгө аяр мамиле кылууга чакырат.
