Кыргызстандыктарга Улуу Британия дагы 1 000 квота берди
Кыргызстандыктар үчүн Улуу Британия дагы 1 000 квота берди. Тиешелүү макулдашууга Жарандарды чет өлкөдө ишке орноштуруу борбору менен британиялык Etero операторунун ортосунда онлайн форматында кол коюлду. Бул тууралуу Эмгек, социалдык камсыздоо жана миграция министрлиги кабарлады.
Макулдашуунун алкагында 18-46 жаштагы КРнын жарандары Улуу Британиянын айыл чарба тармагында 6 айга чейинки мөөнөткө ишке орношууга мүмкүнчүлүк алышат. Талаптардын катарына жаш курагынан тышкары орус тилин билүү, физикалык жана психологиялык ден-соолугу чың болуусу кирет.
«Эмгек акы жумуш саатына 10 фунт стерлинг өлчөмүндө белгиленет. Ошол эле учурда кыргызстандыктар визаны (259 фунт стерлинг), авиабилеттерди (баасы өзгөрүп турат) төлөшү керек, жатакананын жана алгачкы 2 жумадагы тамак-аштын акысын кызматкер көтөрөт. Жалпы чыгым 100 миң сомго чейин болушу мүмкүн», - деп министрлик белгиледи.
Улуу Британияга тандоо тууралуу маалымат migrant.kg сайтында жайгаштырылат.
