Талас аэропортунда курулуш иштер кызуу жүрүп жатат
Жогорку Кеңештин транспорт, коммуникациялар, архитектура жана курулуш боюнча комитетинин төрагасынын орун басары Бактыбек Чойбеков Талас облустук аэропортун реконструкциялоо иштери менен жеринде таанышып келди. Бул тууралуу парламенттин маалымат кызматы билдирди.
Аэропортту жаңылап, ишке берүү маселеси өткөн жылдын октябрь айында транспорт, коммуникациялар, архитектура жана курулуш боюнча комитетинин Талас облусуна болгон көчмө жыйынында каралып, комитеттин тийиштүү чечими кабыл алынган.
«Аэропорттун ишке берилиши Талас облусу үчүн стратегиялык мааниге ээ. Биринчиден, аэропорт иштеп калса чет элдик инвесторлорду тартууга жана облустун экономикасын алдыга жылдырууга жакшы мүмкүнчүлүктөр ачылат. Экинчиден, Талас эли үчүн өлкөнүн башка аймактары менен байланышуу бир топ жеңилдейт», - деп депутат белгиледи.
