Жалал-Абаддагы ооруканасы октябрда курулуп бүтөт – долбоордун сметасы 251.3 млн сом
Министрлер кабинетинин төрагасы Акылбек Жапаров Жалал-Абад облусуна болгон бир күндүк иш сапарынын алкагында бир катар социалдык объектилерге барды. Бул тууралуу минкаб кабарлады.
Такталгандай, Жапаров Жалал-Абад шаарындагы облустук клиникалык оорукананын кошумча имаратынын курулушу менен таанышты. Оорукананын имаратын курууга 251.3 млн сом бөлүнгөн, курулушту 2023-жылдын октябрына чейин бүткөрүү пландалууда.
Андан ары Министрлер Кабинетинин Төрагасы Жалал-Абад шаарындагы Пушкин көчөсүн реконструкциялоо иштери жүрүп жаткан жерге барды.
Узундугу 1 920 чакырымды түзгөн бул көчөнү реконструкциялоого 70.3 млн сом керектелет, оңдоо иштеринин жүрүшү 2023-жылдын 1-августуна чейин бүткөрүлөт.
Мындан тышкары, минкаб төрагасы Жалал-Абад шаарындагы №1 мектептин кошумча имаратынын курулушу менен таанышты. Учурда курулуш 80% бүтүп, республикалык бюджеттен 79.4 млн сом бөлүнгөн.
Жумушчу сапарынын соңунда министрлер кабинетинин башчысы Жалал-Абад шаарындагы Железнодорожная көчөсүндөгү облустук кургак учукка каршы диспансеринин жаңы имаратынын курулушу менен таанышты.
Жаңы имараттын курулушуна республикалык бюджеттен 356 млн сом бөлүнгөн, курулушту 2023-жылдын аягына чейин бүтүрүү пландалууда.
