Салык кылмыштарына каршы атайын полиция түзүлөт
Мамлекеттик салык кызматы Министрлер Кабинетинин "Укук коргоо органы статусуна ээ болгон салык кызматтарынын функциялары тууралуу" токтомдун долбоорун коомдук талкууга койду. Бул демилге салык органдарынын ишин Салык кодекси менен Кыргыз Республикасынын мыйзамдарына толук шайкеш келтирүүгө багытталган.
Долбоордун негизинде салык кылмыштарына каршы күрөшүү үчүн Мамлекеттик салык кызматынын курамында жаңы башкармалык түзүлөт. Бул башкармалык салык төлөөдөн качуу, акциздик товарлардын мыйзамсыз жүгүртүлүшү сыяктуу кылмыштарды аныктоо, алдын алуу жана бөгөт коюу менен алектенет. Ошондой эле, башкармалык укук коргоо жана бажы органдары менен тыгыз кызматташып, ыкчам-аналитикалык иш-чараларды жүргүзөт.
Жаңы түзүлө турган башкармалыктын кызматкерлери укук коргоо органынын статусуна ээ болуп, тиешелүү кепилдиктер менен камсыздалат. Ал эми салык органынын жалпы кызматкерлери өздөрүнүн жарандык кызмат статусун сактап кала беришет. Мындан тышкары, жаңы бөлүмдүн кызматкерлерин тандоо жана окутуу иштери да салык кызматы менен биргеликте жүргүзүлөт.
Иш жүзүндө бул демилге мамлекеттин финансылык-экономикалык коопсуздугун бекемдөөгө жана салыктык көзөмөлдү натыйжалуу жүргүзүүгө өбөлгө түзөт. Ошол эле кезде, эгер долбоор кабыл алынбаса, салык көзөмөлүнүн сапаты төмөндөп, укуктук тактыкта көйгөйлөр жаралышы мүмкүн.
