Ботаникалык бакты реконструкциялоого 340 млн сом керектелет
Министрлер Кабинетинин төрагасы Адылбек Касымалиев Бишкектеги Э.Гареев атындагы Ботаникалык бакка барып, анын учурдагы абалы менен таанышып чыкты. Кароо учурунда бактын кызматкерлери жана жетекчилиги буга чейин аткарылган иштер, учурдагы көйгөйлөр жана бакты сактап калуу боюнча зарыл болгон чаралар тууралуу маалымат беришти. Бул тууралуу Өкмөттөн билдиришти.
Аталган жашыл аймакты комплекстүү реконструкциялоого болжол менен 340 миллион сом талап кылынары белгилүү болду. Реконструкция алкагында: жөө жүргүнчүлөр зонасын жана жолдорду оңдоо, суу менен камсыздоо жана сугат системасын модернизациялоо, дренаж тармагын калыбына келтирүү, сейрек кездешүүчү өсүмдүктөрдү сактоо жана дендрологиялык фондду кеңейтүү сыяктуу иштер каралууда.
Адылбек Касымалиев Ботаникалык бактын маанисин өзгөчө белгилеп, бул аймак илимий-изилдөө жана экологиялык коопсуздук жаатында стратегиялык инвестиция болуп саналарын айтты. Анын пикиринде, бак борбор калаанын тургундары үчүн гана эмес, жалпы өлкө үчүн маанилүү экологиялык жана илимий борбор болушу керек.
МинКаб башчысы тиешелүү мамлекеттик органдарга долбоорду этап-этабы менен ишке ашыруу механизмин иштеп чыгууну жана каржылоо маселесин чечүүнү тапшырды.
