Кыргызстан саламаттыкты сактоого 2030-жылга чейин 130 млрд сом бөлөт

Бүгүн, Бишкекте "Ден соолугу чың адам – гүлдөгөн өлкө" (2019–2030-жылдар) улуттук программасынын алкагында Саламаттыкты сактоо форуму болуп өттү.

Өкмөттүн басма сөз кызматынан билдиргендей, форумда азыркы жетишкендиктер жана келечектеги артыкчылыктуу багыттар талкууланды. Форумга МинКаб төрагасынын орун басары Эдил Байсалов катышып, программаны ишке ашыруудагы маанилүү кадамдарга токтолду.

“Жакынкы беш жылда саламаттыкты сактоого мамлекеттик каржылоону үч эседен ашык көбөйтүү пландалууда. 2025-жылы бул максатка 44 млрд сом бөлүнсө, 2030-жылга карата каржылоо 130 млрд сомго жетет”, — деди Байсалов.

Ошондой эле, медициналык кызмат көрсөтүүнүн мамлекеттик кепилдиктери кеңейип, айрыкча аялдар менен балдардын саламаттыгына өзгөчө көңүл буруларын баса белгиледи. Пренаталдык жана неонаталдык скрининг, эмдөө, оорулардын алдын алуу программалары күчөтүлөт.

Саламаттыкты сактоо министри Эркин Чечейбаев жарандардын ден соолугуна инвестиция салуу өлкөнүн келечеги үчүн өтө маанилүү экенин баса белгилеп, саламаттыкты сактоо кызматтарын жакшыртуу боюнча аткарылып жаткан иштерди белгиледи.

Форумга БУУ системасынын, Бүткүл дүйнөлүк саламаттыкты сактоо уюмунун (БДСУ), эл аралык жана донордук уюмдардын өкүлдөрү катышты.

Форумдун жыйынтыгында саламаттыкты сактоо тармагын өнүктүрүүгө багытталган бир катар маанилүү чечимдер кабыл алынды. Алардын катарында: оорулардын алдын алуу программаларын кеңейтүү, тармакты толук санариптештирүү, медициналык кызматкерлердин кесиптик даярдыгын жогорулатуу жана финансылык ачыктыкты күчөтүү чаралары бар.