Дыйкан 2 гектардан 9,6 тонна буудай алды
Токтогул районунун Торкен айылында Шыкмамат Мананов 2 гектар жерге буудайдын корнетто сортун өстүрүп, жогорку түшүмдүүлүккө жеткенин Суу ресурстары, айыл чарба жана кайра иштетүү өнөр жайы министрлиги билдирди.
Ал буудайдын жогорку түшүмүн алуу максатында 2-репродукциядагы сертификатталган үрөндүн 1 тоннасын 0,5 литр тенозол менен дарылаган. Жылдын башында топуракка анализи жүргүзүлүп, Ош облусунун адистештирилген токсикологиялык лабораториясы тарабынан берилген сунуштамага ылайык жер аянты диаммофос минералдык жер семирткичи менен азыктандырылган. Буудайдын өсүүсүн жакшыртуу жана коргоо максатында 2 этап менен “Кыргыз гумат” органикалык жер семирткичи чачылып, отоо чөптөрдү жок кылуу үчүн дезермон жана эстор гербициддери колдонулган.
Биринчи сугаттан кийин фосфор+калий органикалык жер семирткичи жана козу карын ооруларына каршы тильт фунгициди чачылган. 20-июлда түшүм жыйноо жүргүзүлүп, ар бир гектардан 48 центнер, жалпы 2 гектар аянттан 9 тонна 600 килограмм дан алынган. Дыйкан 2 гектардан 147 300 сом таза киреше алып, өндүрүштүн рентабелдүүлүк деңгээли 159 пайызды түзгөн. Бир килограмм буудайдын өздүк наркы 9,66 сом болсо, андан түшкөн таза киреше 15,34 сом деп эсептелген.
