Чолпон-Атада жаңы административдик имарат курулуп жатат
Ысык-Көл облусунун Чолпон-Ата шаарында аймактык башкармалыктын жаңы административдик имараты курулууда. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, министр Нурдан Орунтаев облуста иш сапары менен болуп, курулуштун жүрүшү менен таанышкан.
Имараттын жалпы аянты 251,91 чарчы метрди түзөт. Анда жыйындар залы, кабылдама, күтүү залы, архив, бирдиктүү терезе жана техникалык бөлмөлөр каралган. Учурда курулуш иштеринин 80%га жакыны аяктаган.
Министрлик билдиргендей, бул имарат мамлекеттик бюджеттен каржыланбастан, министрликтин ички ресурстарынын эсебинен салынып жатат. Азыркы тапта өлкө боюнча ондогон ушул сыяктуу жаңы имараттар курулууда.
