Кыргызстанда балдарга татаал нейрохирургиялык операциялар жасалды
Улуттук госпиталдын базасында мээнин оор кан тамыр ооруларына — аневризма жана артериовеноздук мальформацияга (АВМ) чалдыккан балдарга эндоваскулярдык операциялар ийгиликтүү жасалды.
Саламаттык сактоо министрлигинен билдиришкендей, операцияларды Улуттук эне жана баланы коргоо борборунун жана Улуттук госпиталдын нейрохирургдары биргеликте аткарышкан. Операциялар заманбап ангиографиялык операциялык бөлмөдө, интраоперациялык визуалдаштыруунун жаңы ыкмалары колдонулган шартта өттү.
Ага нейрохирургдар, анестезиолог-реаниматологдор, рентген-лаборанттар жана жандандыруу бөлүмүнүн адистери кирген мультидисциплинардык команда тартылган.
Операцияга чейин балдардын кан тамыр түзүлүшү жана патологиялык өзгөрүүлөрү деталдаштырылган ангиография аркылуу изилденип, ар бир бейтап үчүн дарылоонун эң ылайыктуу ыкмасы тандалып алынган.
Хирургия санариптик ангиография көзөмөлүндө артерия аркылуу жүргүзүлүп, нур жүгүртүү көлөмү азайтылып, инструменттердин так жайгашуусу камсыздалган. Аневризмаларда капты жаап коюу (окклюзия), ал эми АВМде патологиялык түйүндү эмболизациялоо ыкмасы колдонулган.
Контролдук ангиограмма ийгиликтүү жыйынтыкты көрсөттү. Операциядан кийинки абал туруктуу, балдардын неврологиялык көрсөткүчтөрү курактарына ылайык.
Министрлик мындай операциялар балдар нейрохирургиясында чоң жетишкендик болуп, өлкөнүн медициналык мүмкүнчүлүгүн көрсөтөрүн белгиледи.
