Чек арада 5,7 млн сомдук мыйзамсыз косметика аныкталды
Салык кызматкерлери ири суммадагы косметикалык каражаттарды мыйзамсыз алып кирүүгө бөгөт коюшту. Бул тууралуу Мамлекеттик салык кызматынан билдиришти.
Маалыматка ылайык, Мамлекеттик салык кызматынын кызматкерлери УКМКнын Чек ара кызматы менен биргеликте "Ак-Жол" көзөмөл-өткөрмө пунктунда өлкөнүн аймагына косметикалык каражаттарды мыйзамсыз алып кирүү аракетине бөгөт коюшту.
SETRA маркасындагы автобусту текшерүү учурунда товардык коштомо кагаздары жок ар кандай аталыштагы косметикалык каражаттар табылып, тартып алынган. Алардын болжолдуу суммасы 5 млн 739,6 миң сомду түзөт.
Бул факт боюнча материалдар тиешелүү юридикалык баа берүү үчүн укук коргоо органдарына өткөрүлүп берилди.
