Манас шаарында айдоочулук күбөлүк берүүдө коррупциялык фактылар аныкталды
Манас шаарында айдоочулук күбөлүк берүүдө коррупциялык схема аныкталганын УКМК билдирди.
Ыкчам-тергөөдө президенттин Иш башкармалыгына караштуу Транспорт каражаттарын жана айдоочулук курамды каттоо боюнча мамлекеттик борбордун Жалал-Абад аймактык бөлүмүнүн кызматкерлери уюштурган схема жабылып, бөгөт коюлду.
Аталган мекеменин жооптуу кызматкерлери жеке менчик авто мектептердин инструкторлору менен алдын ала сүйлөшүп, практикалык сынак үчүн окуучулардан акча чогултушкан.
Схемага ылайык, авто мектептердин окуучулары 5000 сомдон 10000 сомго чейин акчаны ортомчу аркылуу өткөрүп беришкен. Ал акча мекеменин кызматкерлери аркылуу оң баа алуу үчүн колдонулган. Практикалык сынак күндөрү 10-15 окуучу коррупциялык схема аркылуу сынакты ийгиликтүү тапшырган. Уюштуруучулардын күнүмдүк кирешеси 30 000 сомдон 50 000 сомго жеткен.
2025-жылдын 10-октябрында козголгон кылмыш ишинин алкагында кызматкерлер жана алардын шериктери — Б.М.М., Д.Т.А., С.Э.А. жана М.Б.А. — пара алууда кармалды.
Кармалгандар УКМКнын убактылуу кармоочу жайына киргизилип, иликтөө уланууда.
