Төрөбаев: "960 айылдагы суу көйгөйүн чечүүгө 1,2 млрд доллар талап кылынат"
Министрлер Кабинетинин төрагасынын орун басары, айыл чарба министри Бакыт Төрөбаев Италиянын Рим шаарында өтүп жаткан “Rome Water Dialogue 2025” эл аралык форумунун алкагында “Суу ресурстарын башкаруунун эффективдүү чечимдери” аттуу сессияда сөз сүйлөдү. Бул тууралуу Айыл чарба министрлигинин басма сөз кызматы билдирди.
Форум БУУнун Азык-түлүк жана айыл чарба уюмунун (ФАО) штаб-квартирасында өтүп жатат. Министр өз баяндамасында суунун маанисин, климаттын өзгөрүшүнүн жана калктын өсүшүнүн кесепеттерин, ошондой эле Кыргызстандагы суу ресурстары менен байланышкан негизги көйгөйлөрдү жана мүмкүнчүлүктөрдү белгиледи.
«Суу – бул жашоонун, ден соолуктун жана улуттардын туруктуу өнүгүүсүнүн негизи. Бүгүнкү күндө Борбордук Азияда эң курч маселелердин бири – бул климаттын өзгөрүшүнө байланыштуу суу ресурстарын сактоо жана рационалдуу пайдалануу», – деди Төрөбаев.
Анын айтымында, 2050-жылга чейин дүйнө калкынын жарымы суу тартыштыгына туш болушу мүмкүн, бул азык-түлүк коопсуздугуна олуттуу коркунуч жаратат. Борбор Азия үчүн негизги чакырык – климаттын өзгөрүшү шартында суу ресурстарын сактап, натыйжалуу пайдалануу.
Төрөбаев Кыргызстандагы мөңгүлөрдүн стратегиялык маанисине токтолуп, алар Казакстан, Кытай, Өзбекстан жана Тажикстанды суу менен камсыздаарын белгиледи. Бул жаатта Президент Садыр Жапаровдун «Жашыл мурас» улуттук программасынын маанисин да баса белгиледи.
Ошондой эле ал Ысык-Көлдүн деңгээлинин төмөндөшүнө байланыштуу тынчсыздануусун билдирип, көл аймактын климаттык тең салмактуулугунда маанилүү роль ойной турганын кошумчалады.
Министрдин айтымында, региондогу суу инфраструктурасынын 80%ы эскирген, суу жоготуулар 55%ды түзөт. Ал эми 10 миллионго жакын адам таза ичүүчү сууга жеткиликтүү эмес. Кыргызстанда 960 айылдагы суу көйгөйлөрүн чечүү үчүн 1,2 миллиард доллар инвестиция талап кылынат.
«Сууга мунай жана газ сыяктуу эле көңүл бурууга убакыт келди», — деди Төрөбаев.
Сөзүнүн соңунда министр Кыргызстан менен ФАОнун кызматташтыгын жогору баалап, алдыңкы технологиялар киргизилип, айылдык жамааттардын өнүгүүсүнө салым кошулуп жатканын белгиледи.
