“АгроТехЭкспо – 2025” көргөзмөсүндө техникаларды сатып алууга шарт түзүлөт
“АгроТехЭкспо – 2025” көргөзмөсүндө дыйкан-фермерлер айыл чарба техникаларын сатып алса болорун Айыл чарбасын кооперациялоо, механизациялоо жана инновациялык технологиялар департаментинин директору Нурланбек Кожогулов “Кабар” агенттигиндеги жыйында билдирди.
Анын айтымында, көргөзмөдөгү каржылоо аянтчасында – “Айыл Банк”, “Элдик Банк” жана мамлекеттик лизинг компанияларынын лизинг боюнча кызматтары иштейт. Алар аркылуу дыйкандар айыл чарба техникаларын сатып алышса болот.
“Мында дыйкан-фермерлерибиз техниканын баасынын 10 пайызын гана төлөйт, ал эми калган бөлүгүн Министрлер Кабинети тарабынан бөлүнгөн каражаттын эсебинен банктар каржылап берет. Лизинг 7-9 жылдык мөөнөткө чейин 6 пайыз үстөгү менен берилет”, - деди ал.
17-18-19-октябрда Бишкек шаарындагы Турдакун Усубалиев атындагы аянтта “АгроТехЭкспо – 2025” көргөзмөсү жана "Алтын күз" азык-түлүк жарманкеси өтөт.
