Быйыл Ысык-Көл облусуна 2 млн 334,3 миң турист келди
Быйыл июнь-август айларында Ысык-Көл облусуна келген туристтердин саны 2 млн 334,3 миңди түзгөнүн Улуттук статистика комитетинин Керектөө рыногунун статистикасы башкармалыгынын башчысы Люксина Текеева маалымат жыйынында билдирди.
Анын билдиришинче облус аймагында быйыл уюштурулбаган туристтерди кабыл алган 6 миң 330 үй чарбасы бар экени аныкталган. Бул 2024-жылга салыштырмалуу субъектилердин саны 14 пайызга өскөнүн билдирет.
“2025-жылдын июнь-август айларында жалпы республикага 3 млн 533 миң турист келген. Жалпы туристтердин 9,5%ы Чүй облусуна, 7,5%ы Ош шаарына, 3,6% Ош облусуна туура келет. Туристтик агымдын өсүшү транспорт тутумунун жакшырышына жана шаар четиндеги туристтик комплекстердин активдүү өнүгүшүнө байланыштуу", - деди ал.
Текеева уюшулган жана уюштурулбаган сектордо жайгаштырылган туристтердин саны өткөн жылдын жай мезгилине салыштырмалуу 1 млн 200 миңге, же 2,6%га көбөйгөнүн баса белгиледи.
