Кыргызстан кайра иштетүү тармагында 900дөн ашык жумуш орундары түзүлдү
Айыл чарба продукциясын кайра иштетүү тармагы 2025-жылы тарыхый өсүшкө жеткенин Суу ресурстары, айыл чарба жана кайра иштетүү өнөр жайы министри Бакыт Төрөбаев "Алтын күз" айыл чарба азыктарынын жарманкесиинде билдирди.
Анын айтымында, өнөр жай продукциясынын көлөмү 75 млрд сомго жетип, 9 айда кайра иштетүү тармагында 31 ири ишкана, 4 соода логистикалык борбор, 68 кооператив, 7 МТС түзүлүп, 900дөн ашуун жаңы жумуш орундары ачылып, эл аралык сапат стандарттарында 32 ишканада киргизилген.
"Бул – жаңы ишканалардын курулушу, жабдуулардын модернизациясы жана экспорттук кубаттуулуктун артканын билдирет. Кыргызстандын мөмө-жемиштерин, жаңгак, фасоль жана балды кайра иштетүү боюнча ишканалар Евразия, Кытай, Япония жана Жакынкы Чыгыш рынокторуна экспортту кеңейтип жатышат. 2025-жыл — тарыхый ийгилик-рекорддордун жылы болсо, 2026-жыл — инновациялардын, экспорттун жана туруктуу өсүүнүн жылы болсун!", -деди аталган жарманкеде Бакыт Төрөбаев.
