Баткенде 500 орундуу жаңы мектеп курулууда
Баткен районуна караштуу Жаңы-Жер айылында 500 орунга ылайыкташтырылган жаңы мектептин курулушу активдүү жүрүп жатат. Бул тууралуу Курулуш, архитектура жана турак жай- коммуналдык чарба министрлиги маалымдады.
Курулуш республикалык бюджеттин эсебинен каржыланууда, долбоордун тендердик баасы 164 миллион сомду түзөт. Мектеп үч блоктон туруп, жалпы аянты 3220 чарчы метрди камтыйт. Ал эки кабаттуу окуу корпусунан, өтмө галереядан жана спорт залынан турат.
Азыркы учурда курулуш-монтаждоо иштери 65%га бүткөрүлүп, обьект мамлекеттик көзөмөлдө курулууда.
Белгилей кетсек, бул мектеп эски имараттын ордуна курулууда. Алгачкы имарат 2004-жылы пайдаланууга берилген.
