Мал чарбасын жакшыртууга багытталган геномдук борбор курулууда
Сокулук районунун Фрунзе айылында жайгашкан Кыргыз мал чарба жана жайыт институтунун аймагында жаныбарларды геномдук баалоо боюнча тренинг-борборунун жана жатакананын курулушу башталып, капсула салуу аземи болуп өттү. Бул тууралуу Айыл чарба министрлигинин басма сөз кызматы маалымдады.
Иш-чарага Министрлер Кабинетинин төрагасынын орун басары – айыл чарба министри Бакыт Төрөбаев катышып, айыл чарба жаныбарларынын биотехнология бөлүмүнүн ишмердүүлүгү менен да таанышты.
Геномдук баалоо борбору — мал чарба тармагында илим жана инновацияны өнүктүрүүгө багытталган маанилүү долбоор. Ал адистерди даярдоо, илимий изилдөөлөрдү жүргүзүү жана жаныбарлардын продуктивдүүлүгүн жогорулатуу үчүн заманбап платформа болору белгиленди.
Бул долбоор Кореянын эл аралык кызматташтык агенттиги (KOICA) тарабынан ишке ашырылып жатат. Анын алкагында Кыргызстанда малдын генетикалык көрсөткүчтөрүн жакшыртуу жана ветеринардык адистердин потенциалын жогорулатуу көздөлүүдө.
