Кара-Сууда сүттөн жана мөмө-жемиштерден улуттук суусундуктар өндүрүлүүдө
Кара-Суу районунун Социализм айылында жайгашкан «Ала-Тоо Амир» ишканасы табигый сүттөн жана түштүк аймактардан чогултулган мөмө-жемиштерден даярдалган улуттук жана муздак суусундуктарды чыгарат. Бул тууралуу Айыл чарба министрлигинен билдиришти.
Суу ресурстары, айыл чарба жана кайра иштетүү өнөр жайы министри Бакыт Төрөбаев компаниянын ишмердүүлүгү менен таанышып, өндүрүш процесси, продукциянын сапаты жана келечек пландары менен таанышты.
Ишканада кычкыл сүт азыктарын жана табигый чийки заттан даярдалган башка азыктарды өндүрүү үчүн эки цех иштейт. Компания жылына 3000 тоннадан ашуун сүттү кайра иштетет жана продукция Ош, Жалал-Абад, Баткен шаарларындагы дүкөндөрдө, ошондой эле ири гипермаркеттерде жана супермаркеттерде сатылат.
Учурда ишканада 50дөн ашуун кызматкер эмгектенет, сезондук жумушчулар менен саны эки эсе көбөйөт. Өндүрүштүк базаны кеңейтүү максатында компания Мады айыл аймагында жаңы заманбап завод курууну пландап жатат. Жаңы завод тамак-аш коопсуздугунун эл аралык стандарттарына жооп берген сүттү кайра иштетүү линиясына ээ болуп, продукциянын түрүн кеңейтүүгө мүмкүнчүлүк берет, - деп айтылат маалыматта.
Маалыматка ылайык, «Ала-Тоо Амир» компаниясы келечекте продукциясын республиканын бардык аймактарына жеткирүүнү пландоодо.
