Кыргызстандык жана чет өлкөлүк жумушчулардын укуктары бирдей корголот
Чет өлкөлүк жумушчулардын укуктары Кыргызстан жарандарыныкы менен бирдей деңгээлде корголгонун “Биринчи радио” эфиринде Эмгек мыйзамын текшерүү жана көзөмөлдөө боюнча кызматынын өзүнчө категориядагы жумушчулардын эмгек маселеси боюнча бөлүмүнүн жетекчиси Азизбек Алиханов билдирди.
Анын айтымында, Конституция жумушчуларды чет өлкөлүк, кыргызстандык деп бөлбөйт.
“Эгер адам өндүрүштө каза болсо анын туугандарын, жакындарын издейбиз. А миграция ар бир конкреттүү учурда мыйзамдуубу же мыйзамсызбы ал башка маселе. Эгер чет өлкөлүк жаракат алса ага: “Сен көрсө мыйзамсыз мигрант экенсиң, сеникин иликтебейбиз!” деп айта албайбыз. Биз өз ишибизди талаптагыдай аткарабыз, андан соң миграция боюнча тиешелүү орган өз линиясы боюнча чараларды көрөт. Балким, бул депортация же башкасы болушу мүмкүн”,-дейт ал.
Профессионалдык союздар федерациясынын техникалык жана укуктук инспекциясынын жетекчиси Жеңиш Казакбаев Кыргызстандагы өндүрүштө Кытай жарандары каза болгондо толук кандуу иликтөө жүргүзүлгөнүн кошумчалады.
